SHBA dhe BE do të rrisin sanksionet ndaj Rusisë pas masakrës së fundit mbi civilët! Kronologjia për ditën e mërkurë!

Lufta e Rusisë në Ukrainë po merr një dimension të ri me dëshmitë në rritje të mizorive të të drejtave të njeriut nga trupat e Vladimir Putin, të akuzuar për vrasjen e civilëve me gjakftohtësi ndërsa ata tërhiqeshin nga rajoni i Kievit. Aktualisht po zhvillohen lëvizje për të hetuar krimet e luftës, por ekziston frika se mund të ndodhin masakra të ngjashme, duke pasur parasysh dështimin e Rusisë për të fituar kontrollin e vendit apo edhe të ndonjë qyteti kyç pas pushtimit të saj më 24 shkurt.

Moska tani po përqendron ofensivën e saj në Ukrainën lindore dhe jugore. Mijëra janë vrarë deri më tani dhe bombardimet ruse kanë shkaktuar shkatërrim të gjerë. Miliona njerëz janë larguar nga shtëpitë e tyre, duke krijuar krizën më të keqe të refugjatëve në Europë që nga Lufta e Dytë Botërore. Lufta ka thelluar këputjen mes Rusisë dhe Perëndimit, e cila po planifikon më shumë sanksione ekonomike kundër Moskës.

Pikat kryesore të së mërkurës:

• Presidenti ukrainas Volodymyr Zelenskyy thotë se ai dhe liderët perëndimorë kanë diskutuar një raund të ri sanksionesh kundër Rusisë.
• Shtetet e Bashkuara, në koordinim me Bashkimin Europian dhe G7, po kërkojnë të vendosin një ndalim për të gjitha investimet e reja në Rusi, si pjesë e një raundi të ri masash që do të miratohen të mërkurën.
• BE-ja ka premtuar një raund të pestë të sanksioneve të reja “këtë javë”, duke goditur sektorin e energjisë për herë të parë.
• Brukseli kërkon një embargo ndaj importeve të qymyrit rus. Por ekspertët thonë se ndikimi i sanksioneve “do të bëhet i vërtetë” vetëm pasi të vihen në shënjestër importet ruse të naftës dhe gazit.
• kjo vjen në mes të zemërimit global ndaj provave në rritje të mizorive ruse kundër civilëve në Ukrainë, duke çuar në akuza se krimet e luftës po kryhen nën komandën e Moskës.
• Zelenskyy i tha Këshillit të Sigurimit të OKB-së se ushtria ruse duhet të sillet para drejtësisë për krime lufte, duke i krahasuar forcat ruse me “terroristët” për masakrën e civilëve në Bucha dhe duke paralajmëruar për më shumë mizori.
• Rusia përsëri ofroi një mohim të plotë, duke i thënë OKB-së se mizoritë ishin “të inskenuara”, një pretendim i kundërshtuar nga imazhet satelitore dhe një katalog i dëshmive të dëshmitarëve.
• Presidenti amerikan Joe Biden miratoi një transferim prej 100 milionë dollarësh (92 milionë euro) të raketave anti-blind Javelin në Ukrainë të martën, sipas një zyrtari të administratës.
• Një zyrtar ukrainas thotë se trupat ruse kanë lejuar 1,496 civilë të evakuojnë qytetin e rrethuar të Mariupolit me automjet privat, por kanë bllokuar hyrjen e një kolone autobusësh evakuimi.
• Ministrat e jashtëm të NATO-s takohen në Bruksel të mërkurën, ndërsa aleatët kërkojnë të rrisin ndihmën ushtarake dhe humanitare për Ukrainën.
• Gjithashtu të mërkurën, Zelenskyy do t’i drejtohet parlamentit irlandez.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.