SHBA dhe BE kërkojnë formimin e shpejtë të institucioneve të Kosovës

Njohësit e zhvillimeve politike në vend thonë se duhet shpejtuar në formimin e institucioneve, pas përfundimit të zgjedhjeve të parakohshme.

Ish-ambasadori i Maqedonisë në Bashkimin Evropian, Blerim Reka, i cili njëherësh është njohës i zhvillimeve politike në Kosovë ka thënë se nëse Kosovës para tre vjetësh iu deshën gjashtë muaj të humbura për të formuar Qeverinë, tani nuk e ka luksin që t’i humbë edhe gjashtë muaj apo më shumë në beteja të panevojshme të inateve ndërpartiake.

“Sidomos jo si një shtet që mezi nënshkroi MSA-në dhe ende nuk ka regjim, pa viza me BE-në. Një Britani e Madhe e fuqishme dhe e pasur edhe mund t’i lejojë vetes brenda disa muajve të mbajë dy palë zgjedhje, por jo një Kosovë e varfër. Nëse në përpjekjet e para, koalicioni PAN nuk arrin të formojë Qeverinë e nuk mandatohet Vetëvendosja vendi do të shkojë në zgjedhje të reja”, thotë Reka.

Por atëherë, ai thekson se Vetëvendosja do të forcohet edhe më shumë, duke e formuar në vjeshtë vetë Qeverinë pa nevojë koalicioni.
“Nëse pas tre vjetësh ‘Vetëvendosja’ u rrit për 120 për qind, çka mund të presim pas vetëm tre muajsh si fituese e këtyre zgjedhjeve? 2017-a është krejtësisht ndryshe nga 2014-a. Kush nuk e kupton këtë vërtet jeton jashtë realitetit politik”, thotë Reka, raporton Gazeta Zëri në Kosovë.

Ai ka shtuar se në zgjedhjet e 11 qershorit votuan për të parën herë ata që kishin lindur në vitin 1999.

“Në vjeshtë kjo kategori moshe vetëm sa do të jetë më shumë në numër në trupin elektoral dhe besoj se ju vetë mund ta parashikoni, që tani në qershor, rezultatin e zgjedhjeve eventuale të parakohshme në vjeshtë”, ka thënë ai.

Reka beson se Thaçi do të veprojë sipas Kushtetutës, por nëse koalicioni që ka fituar më shumë nuk arrin t’i sigurojë 61 deputetë, Presidenti, sipas tij, duhet t’i japë mandatin partisë se mund ta bëjë këtë.

Dhe këtë herë, për dallim nga 2014-a, Reka thotë se jo vetëm Thaçi, por më shumë SHBA-ja dhe BE-ja do të kërkojnë formimin sa më të shpejtë të Qeverisë së re për shkak të prioriteteve gjeopolitike dhe rajonale, ku një Kosovë vakum strategjik, pa qeveri, me terren të hapur për përzierje të lojtarëve të tjerë jashtë komunitetit Euroatlantik (si Rusia apo ISIS-i), siç shprehet ai, vetëm sa do ta zgjaste agoninë qeveri-formuese.

“Besoj se e dini çfarë ndodhi me përzierjen para paszgjedhore ruse në Malin e Zi vjet, në Maqedoni sivjet, e çfarë po ndodh në Shqipëri këto ditë”.
Reka thotë se nëse PAN-i nuk arrin ta formojë Qeverinë, Vetëvendosja në koalicion me të tjerët mund ta formojë atë. Ai nuk beson se mund t’i mohohet dhënia e mandatit qeveri-formues një partie të tillë, pasi sipas tij këto përcaktime të qarta politike janë njëkohësisht edhe kërkesa të komunitetit Euroatlantik.
“Fundja edhe SHBA-ja, por edhe BE-ja, këto ditë ishin të qartë, formim sa më i shpejtë i Qeverisë nga ata që dëshmojnë se kanë siguruar 61 mandate”, thotë Reka.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.