SHBA dhe Europa planifikojnë çdo ndërprerje të mundshme të gazit natyror rus!
Zyrtarët amerikanë dhe europianë po koordinohen me furnizuesit e gazit natyror anembanë globit për të zbutur ndikimin nëse Rusia do të ndërpresë furnizimet me energji në konfliktin mbi Ukrainën, thonë zyrtarët e administratës së Biden.
Shtetet e Bashkuara dhe aleatët europianë kanë premtuar ndëshkimin me sanksione ekonomike dhe politike nëse Rusia zhvendos ushtrinë e saj në Ukrainë, por shqetësohen për pasojat për europianët nga çdo sanksion i tillë, duke përfshirë Rusinë që mund të ndërpresë dërgimin e gazit të saj natyror në Europë në kulmin e dimrit.
Putin ka vendosur afërsisht 100,000 trupa pranë kufirit të Ukrainës për javë të tëra, duke shkaktuar një krizë diplomatike për Europën dhe Shtetet e Bashkuara. Ai mohon çdo qëllim për të pushtuar.
Çdo masë amerikane dhe europiane kundër Rusisë në rast të një pushtimi “ka pasoja edhe për të tjerët, përfshirë ne”, tha Sekretari i Shtetit Antony Blinken në komentet si pjesë e një serie leksionesh të hënën mbrëma.
Nëse është e nevojshme, Europa do të shikojë furnizimet me gaz natyror në Afrikën e Veriut, Lindjen e Mesme, Azi dhe Shtetet e Bashkuara. Përpjekja do të kërkonte “vëllime më të vogla nga një mori burimesh” për të kompensuar një ndërprerje ruse, sipas një prej zyrtarëve.
Administrata Biden e ka pranuar se presidenti Vladimir Putin ka një tolerancë të lartë për dëmin e ekonomisë së Rusisë që do të vinte me sanksione. Por zyrtarët thanë se qasja “fillo lart, qëndro lart” ndaj ndëshkimeve që ata kanë paralajmëruar rusët që do të merrnin në negociata mund të ketë ndikim në llogaritjet e Putinit.
Në Shtetet e Bashkuara, një grup që përfaqëson përdoruesit dhe prodhuesit e mëdhenj industrialë të energjisë që kundërshton eksportin e gazit natyror amerikan u shfaq i hapur për të shqyrtuar një përjashtim për të ndihmuar europianët të përballojnë çdo ndërprerje të mundshme të gazit natyror rus.
Grupi, Konsumatorët e Energjisë Industriale të Amerikës, i ka kërkuar Sekretares së Energjisë Jennifer Granholm të kufizojë eksportet e gazit natyror të lëngshëm ose LNG. Rritja e eksporteve të SHBA-së ka ndihmuar në rritjen e çmimeve të gazit natyror, argumenton grupi.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.