SHBA dhe Kanadaja nisin vaksinimin. Ofrohen dozat e para të vaksinës së Pfizer në Kaliforni dhe Kebek
Programi i vaksinimit në masë ka nisur në Amerikën e Veriut, me Shtetet e Bashkuara dhe Kanadanë që kanë ofruar dozat e para të vaksinës. Punëtorët e shëndetësisë në Kaliforni morën vaksinën e Covid-19 të Pfizer dhe një infermiere në dhomën e emergjencave në Los Angeles deklaroi se “ndihma është rrugës”. Infermierja, Kim Taylor, mori dozën e parë të vaksinës, ndërkohë që injektimi i saj po vëzhgohej nga guvernatori i Kalifornisë, Gavin Newsom, kryebashkiaku i Los Angeles, Eric Garcetti dhe disa anëtarë të medias. Vaksina e Covid-19 e zhvilluar nga Pfizer dhe partneri gjerman BioNTech u autorizua për përdorim nga rregullatorët në SHBA dhe Kanada gjatë fundjavës. Qeveria amerikane synon të shpërndajë dërgesën e parë prej 2.9 milionë vaksinash deri në fund të javës.
“Dua t’ju bëj në dije që ndihma është rrugës. Sot është vetëm hapi i parë. Së shpejti më shumë vaksina do shpërndahen tek punëtorët e shëndetësisë dhe popullsia me cënueshmërinë më të lartë.”
Spitali ishte një ndër 55 vendndodhjet kombëtare që morën vaksinën e parë ditën e Hënë. Kryebashkiaku Garcetti inkurajoi njerëzit që të festojnë, por jo të ulin mburojën ndaj virusit. Ndërkohë, një grua e moshuar në Kebek, Kanada ka marrë gjithashtu vaksinën e parë të Pfizer. Kanadaja nisi fushatën e vaksinimit duke injektuar punëtorët e shëndetësisë në vijë të parë të luftës me virusin dhe të moshuarit në qendrat e kujdesit shëndetësorë, duke u bërë vendi i tretë që administron vaksinën e Pfizer me BioNTech. Kebeku është vendi më i goditur nga 10 provincat e Kanadasë dhe 50 mijë njerëz pritet të vaksinohen atje, deri më 4 janar, sipas Ministrit të Shëndetësisë, Christian Dube. Më shumë se 60% e 13,431 vdekjeve në Kanada kanë ndodhur në qendrat e kujdesit për të moshuarit, në rënie nga 80% në valën e parë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.