SHBA do ngadalësohen! – Lufta tregtare, ekspertët projektojnë përgjysmim të normave të rritjes

Rritja ekonomike e Shteteve të Bashkuara të Amerikës do të ngadalësohet ndjeshëm gjatë tremujorëve në vijim. Pasi preku kulmin 4-vjeçar në periudhën Prill-Qershor, rrjedhojë e qasjes së Donald Trump për të hapur një luftë tregtare, parashikojnë ekspertët. Ekonomia më e madhe në botë morri një shtysë domethënëse vitin e kaluar nga paketa e re fiskale që parashikonte shkurtim taksash në masën 1.5 trilionë dollarë, duke u rritur me një hap në 4.1% gjatë periudhës Prill-Qershor të këtij viti.

Kjo është performanca më e mirë në katër vite. Anketa më e fundit e ekonomistëve dhe ekspertëve nga Reuters tregon se, ekonomia amerikane do të humbë vrullin gjatë muajve në vijim. Madje, ekonomistët projektojnë se, brenda fundit të vitit të ardhshëm norma e  rritjes do të jetë sa gjysma e rekordit të këtij viti, pra në rreth 2%. Ekonomistët projektojnë ngadalësim të rritjes në 3% që këtë tremujor dhe në 2.7% tremujorin e ardhshëm.

Lufta tregtare vlerësohet si mjaft e rrezikshme për ekonominë e vendit, sidomos në një kohë që Donald Trump po i shpall luftë të gjithëve, duke larguar edhe aleatët tradicionalë të vendit. Pavarësisht se Donald Trump është shprehur se vendosja e tarifave doganore do të nxisë ekonominë amerikane, asnjë prej ekspertëve nuk e ndan këtë mendim.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.