SHBA do të forcojë sistemin e kalimit kufitar të Shqipërisë – Instalimi i PISCES nis nga Rinasi

Shtetet e Bashkuara të Amerikës do të instalojnë në vendin tonë sistemin për krahasimin dhe vlerësimin e sigurt të identifikimit personal (PISCES). Kjo do të realizohet falë një memorandumi të nënshkruar më 22 Mars 2018, i cili pritet të ratifikohet së shpejti nga Kuvendi i Shqipërisë.

Marrëveshja përcakton se  SHBA do të instalojnë dhe mirëmbajnë të gjitha pajisjet elektronike të nevojshme për funksionimin e sistemit PISCES, i cili ka si element kryesor të dhënat biometrike, që identifikojnë edhe rastet e vështira për t’u zbuluar nga sistemi aktual. Këto të dhëna do të krahasohen me regjistrat e Interpolit dhe të FBI-së, duke na dhënë  një  përparësi  në zbulimin dhe  ndalimin e personave të kërkuar në nivel ndërkombëtar.

Krahas instalimit, Shqipëria do të përfitojë nga një rinovim i infrastrukturës duke pajisur çdo  punonjës me kompjuter, lexues  dokumentesh, lexues gjurme gishti dhe kamera për kontrollin e fytyrës.

Instalimi i këtij sistemi do të nisë nga Aeroporti Ndërkombëtar i Rinasit “Nënë Tereza” dhe do të vijojë me pikat e tjera kufitare në vend. Ndërkohë, punonjësit e personelit do të nisin gradualisht trajnimin për operimin e sistemit.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.