SHBA: Gjykata Supreme ‘kundër’ Biden. Rrëzon nismën për vaksinimin e detyruar në sipërmarrjet e mëdha!
Qeveria e presidentit Joe Biden kërkonte që të detyronte rreth 80 milionë amerikanë të punësuar të vaksinoheshin ose të kryenin teste të shpeshta, dhe ta zyrtarizonte këtë rregull n të gjithë vendin për sipërmarrjet e mëdha. Por këto plane tani u hodhën poshtë nga Gjykata Supreme në Uashington, që e ndali nismën në fjalë. Në argumentim thuhet, se një rregullore e tillë e nxjerrë jo nga parlamenti, por në rrugë administrative i tejkalon kompetencat e autoritetit përgjegjës.
Kështu firmat me mbi 100 të punësuar tani për tani nuk kanë nevojë të kujdesen, që punonjësit e tyre të vaksinohen ose të testohen ndaj COVID-19 sikurse bie edhe detyrimi për mbajtjen e maskës.
Qeveria e konsideronte këtë rregull si një mjet presioni të rëndësishëm ndaj sipërmarrjeve, që në sfondin e ngarkesës që krijohet nga testimet rregullisht t’i vinin në lëvizje punonjësit e tyre për t’u vaksinuar, në mënyrë që të rritej kuota e vaksinimit në SHBA. Deri tani në SHBA janë vaksinuar plotësisht ndaj koronavirusit 63 % e popullsisë – ose rreth 208 milionë vetë. Prej tyre rreth 77 milionë, ose 37 % kanë marrë edhe dozën përforcuese të vaksinës.
Në një vendim tjetër për detyrimin për vaksinim të personelit mjekësor në spitale dhe shtëpitë e kujdesit, që mbështetet financiarisht nga federata, Gjykata Supreme i dha të drejtë qeverisë. Bazuar në situatën ligjore në fuqi qeveria ka kompetencën, të kujdeset për shëndetin dhe sigurinë e pacientëve në programet e shërbimit dhe asistencës mjekësore. Kështu për shumicën e institucioneve të shëndetësisë vlen detyrimi për vaksinim ndaj koronavirusit. DW
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.