SHBA kërkon pezullimin e taksave tregtare të Kosovës ndaj Serbisë- Palmer: ‘Ky është një vendim “thelbësor” për të ardhmen e Ballkanit Perëndimor”
SHBA, i kërkoi Kosovës t’i japë fund taksave për mallrat serbe, në mënyrë që bisedimet e ndërmjetësuara nga Bashkimi Evropian, në zgjidhjen e mosmarrëveshjes midis ish armiqve të luftës të mund të rifillonin. Zëvendës ndihmësi i sekretarit të shtetit, Matthew Palmer, tha në një konferencë të përbashkët shtypi me presidentin serb, Aleksandar Vuçiç, se normalizimi i plotë i marrëdhënieve midis Serbisë dhe provincës së saj të mëparshme është “thelbësor” për të ardhmen e Ballkanit Perëndimor. Kosova shpalli pavarësinë në vitin 2008, të cilën Serbia nuk e njeh. Dialogu i ndërmjetësuar nga BE ka ngecur pasi Kosova, vendosi një tarifë 100% për të gjitha mallrat që vijnë nga Serbia dhe Bosnja vitin e kaluar.
Palmer tha se tarifat paraqesin një “pengesë” për dialogun dhe duhet “të hiqen ose të pezullohen në mënyrë të tillë që të lejojë palët të kthehen në tryezën e bisedimeve”. Zyrtarët e Kosovës kanë hedhur poshtë në mënyrë të përsëritur thirrjet nga zyrtarët e SH.B.A. dhe BE për heqjen e taksave.
Serbia, e cila ka mbështetjen e Rusisë, kërkon një marrëveshje kompromisi me Kosovën, ndërsa Kosova, e mbështetur nga SHBA, këmbëngul në njohjen e plotë të shtetësisë së saj.
Vuçiç kurrë nuk ka specifikuar detajet e planit të tij të “kompromisit”, por zyrtarë të tjerë serbë kanë lënë të kuptohet se do të përfshinte marrjen e një pjese të veriut të Kosovës ku serbët përbëjnë 90 përqind të popullsisë, në këmbim të njohjes së pavarësisë së Kosovës.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.