SHBA, kompanitë konkurrencë për punëtorë – Numër rekord të larguar vullnetarisht nga puna, pagat rritje me 4.9%

Numri i amerikanëve që janë larguar vullnetarisht nga puna është rritur në një nivel rekord, gjatë shtatorit, ndërsa hapja e vendeve të reja të punës qëndroi mbi nivelet përpara pandemisë, një shenjë se bizneset kanë vijuar të rrisin pagat, për të tërhequr punëtorët më të mirë. Vëzhgimi mbi tregun e punës i publikuar nga Departamenti i Punës në Shtetet e Bashkuara të Amerikës reflekton një ekonomi të pabarabartë, me një kërkesë të lartë kundrejt mungesës së fuqisë punëtore dhe të mallrave.

Kjo ka bërë që inflacioni të rritet në nivelin më të lartë në 31 vitet e fundit. Në anën tjetër, inflacioni i pagave tregoi pak shenja rënieje, pavarësisht se norma ditore e infektimeve me Covid-19 ka filluar të zbehet. Punëdhënësit në çdo industri po konkurrojë ashpër për të joshur punëtorët. Mungesa e fuqisë punëtore nxiti një rritje të pagave me bazë vjetore prej 4.9%.

Por, kjo rritje është më e ulët se inflacioni që rezultoi në 6.2%, duke bërë që fitimet reale të jenë në rënie. Një vëzhgim tjetër nga Universiteti i Miçiganit, tregoi se mes konsumatorëve ekziston shqetësimi mbi gjendjen e ekonomisë, që preku nivelin më të ulët në 1 dekadë. Një pjesë e vogël e të anketuarve besojnë se, politikëbërësit po marrin hapa të mjaftueshme për të trajtuar inflacionin e lartë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.