SHBA lehtëson kufizimet – Do të pranojë vaksinat COVID-19 të miratuara nga OBSH për vizitorët ndërkombëtarë
Shtetet e Bashkuara do të pranojnë përdorimin nga vizitorët ndërkombëtarë të vaksinave COVID-19 të autorizuara nga rregullatorët amerikanë ose Organizata Botërore e Shëndetit, deklaroi Qendra për Kontrollin dhe Parandalimin e Sëmundjeve. Më 20 Shtator, Shtëpia e Bardhë njoftoi se Shtetet e Bashkuara në Nëntor do të heqin kufizimet e udhëtimit për udhëtarët me linja ajrore nga 33 vende, përfshirë Kinën, Indinë, Brazilin dhe shumicën e shtetete të Europës, që janë plotësisht të vaksinuar kundër COVID-19, por nuk specifikoi se cilat vaksina do të pranoheshin.
Një zëdhënëse e CDC tha se gjashtë vaksina që janë të autorizuara ose miratuara nga FDA ose të listuara për përdorim urgjent nga OBSH do të plotësojnë kriteret për udhëtimin në SHBA. Ndërkohë, CDC ka informuar linjat ajrore për të përgatitur sistemet e tyre për vaksinat që do të pranoheshin, ndërkohë që në vijim do të publikojë informacion shtesë pasi kërkesat e udhëtimit të jenë përfunduar.
Airlines for America, një grup tregtar që përfaqëson disa kompani ajrore u shpreh pozitivisht për këtë vendim në mënyrë që zbatimi të hyjë në fuqi në fillim të nëntorit. Disa vende i kishin bërë presion administratës Biden të pranonte vaksinat e miratuara nga OBSH, pasi ato të autorizuara nga Administrata Amerikane e Ushqimit dhe Barnave nuk përdoren gjerësisht në të gjitha vendet.
Shtetet e Bashkuara do të pranojnë udhëtarët e vaksinuar plotësisht nga 26 vendet e Shengenit në Europë, si dhe Britania, Irlanda, Kina, India, Afrika e Jugut, Irani dhe Brazili.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.