SHBA, me aleatë kundër Kinës – Marrëveshja me BE shton përqëndrimin te praktikat kineze
Shtetet e Bashkuara bënë të ditur se do të zhvillojnë biseda mbi tregtinë me Kanadanë dhe Meksikën, pas arritjes së një dakordësie për të pezulluar tarifat me Bashkimin Europian. Marrëveshja surprizë e arritur këtë javë mes Donald Trump dhe presidentit të Komisionit Europian, Jean-Claude Juncker, do të sjellë pezullimin e tarifave të reja nga Washingtoni, si taksa prej 25% në importe për makinat europiane. Marrëveshja solli një nxitje të tregjeve të aksioneve, ndërkohë që shqetësimet për luftën tregtare u larguan.
Të dyja palët pranuan se dakordësia mes Trump dhe Juncker ishte një sukses. Në përgjigje për pezullimin e tarifave nga Washingtoni, Bashkimi Europian do të shtojë importet e sojës dhe energjisë nga SHBA. Një aspekt pozitiv i marrëveshjes, sipas zyrtarëve, është se të dyja palët kanë rënë dakord që të bashkëpunojnë, për të trajtuar abuzimet e tregut të Kinës. Trump ka lajmëruar barriera ndëshkuese për importet kineze, që të ndalojë fuqizimin e industrive të teknologjisë së lartë në Kinë, që kanë kërcënuar dominancën e Shteteve të Bashkuara.
SHBA dhe Europa kanë akuzuar vazhdimisht Kinën se vjedh sekretet e teknologjisë. Presidenti francez, Emmanuel Macron, doli kundër marrëveshjes, duke thënë se nuk do të bisedojë për bujqësinë me Shtetet e Bashkuara. Nëse funksionon, pakti mes SHBA dhe Europës mund të lejojë të dyja vendet që të fokusohen te Kina, që nëpërmjet fuqizimit të shpejtë ekonomik po i kërcënon vendet. Politikanët në Washington kaluan një legjislacion për të reduktuar investimet kineze në SHBA. Në Europë janë shtuar gjithashtu shqetësimet mbi rritjen e influencës kineze.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.