SHBA miraton përdorim urgjent të vaksinës së koronavirusit Pfizer / BioNTech – “Moment historik në luftën kundër pandemisë”

SHBA ka autorizuar përdorimin emergjent të vaksinës COVID-19 të prodhuar nga kompania farmaceutike Pfizer dhe kompania gjermane e bioteknologjisë BioNTech, duke hapur rrugën për një program të imunizimit masiv në vend.

Administrata Amerikane e Ushqimit dhe Barnave i dha vaksinës koronavirus një dritë jeshile, pasi një panel këshillues i ekspertëve qeveritarë arriti në përfundimin se vaksina dukej e sigurt dhe efektive.

“Autorizimi i FDA për përdorimin emergjent të vaksinës së parë COVID-19 është një moment historik në luftimin e kësaj pandemie shkatërruese që ka prekur kaq shumë familje në Shtetet e Bashkuara dhe në botë”, tha Komisioneri i agjencisë Dr Stephen M. Hahn.

Hahn tha se veprimi ndoqi “një proces të hapur dhe transparent të rishikimit” që përfshinte të dhëna nga ekspertë të shumtë dhe shkencëtarë për të përcaktuar vaksinën që përmbush standardet e agjencisë.

Presidenti i SHBA Donald Trump e quajti lajmin e vaksinës një “mrekulli mjekësore” dhe një nga “arritjet më të mëdha shkencore në histori” në një video të postuar në llogarinë e tij në Twitter. Ai tha se vaksina e parë do të administrohej brenda 24 orëve.

SHBA ka nënshkruar një marrëveshje me Pfizer dhe BioNTech për të blerë 100 milion doza të vaksinës dhe mund të marrin deri në 500 milion doza shtesë. Vaksina kërkon dy doza për person, të marra me disa javë diferencë.

Mbretëria e Bashkuar ishte vendi i parë që autorizoi vaksinën Pfizer / BioNTech dhe filloi vaksinimin e personave të moshuar që janë në rrezik për zhvillimin e një forme më të rëndë të virusit në fillim të kësaj jave.

Agjencia Europiane e Barnave aktualisht po rishikon sigurinë dhe efikasitetin e vaksinës dhe është vendosur të japë një vendim para 29 Dhjetorit.

Pfizer dhe BioNTech ishin kompanitë e para që lëshuan rezultate paraprake të efikasitetit nga provat e fazës tre, që përcaktoi se vaksina kandidate ishte 95% efektive, përfshirë 94% efektive në të rriturit mbi moshën 65 vjeç.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.