SHBA ndalon Rusinë të paguaj mbajtësve të borxhit të saj sovran mbi 600 milion dollarë!

Shtetet e Bashkuara ndaluan qeverinë ruse të hënën që t’u paguajë mbajtësve të borxhit të saj sovran më shumë se 600 milionë dollarë nga rezervat e mbajtura në bankat amerikane, në një lëvizje që synon të rrisë presionin ndaj Moskës dhe të ‘hajë’ zotërimet e saj të dollarëve. Nën sanksionet e vendosura pasi Rusia pushtoi Ukrainën më 24 shkurt, rezervat valutore të mbajtura nga banka qendrore ruse në institucionet financiare amerikane u ngrinë.

Por Departamenti i Thesarit kishte lejuar qeverinë ruse që t’i përdorte ato fonde për të bërë pagesa kupon për borxhin sovran të shprehur në dollarë rast pas rasti. Të hënën, ndërsa pagesa më e madhe erdhi në afat, duke përfshirë një pagesë principal prej 552.4 milionë dollarësh për një obligacion të maturuar, qeveria amerikane vendosi të ndërpresë aksesin e Moskës në fondet e ngrira, sipas një zëdhënësi të Thesarit të SHBA.

Një pagesë kuponi prej 84 milionë dollarësh duhej gjithashtu të hënën për një obligacion sovran në dollarë të vitit 2042. Masa kishte për qëllim të detyronte Moskën të merrte vendimin e vështirë nëse do të përdorte dollarët në të cilët ka akses për pagesat e borxhit të saj ose për qëllime të tjera, duke përfshirë mbështetjen e përpjekjeve të saj të luftës, tha zëdhënësi.

Rusia përballet me një dështim historik nëse zgjedh të mos e bëjë këtë. JPMorgan Chase & Co, e cila kishte përpunuar pagesat si një bankë korrespondente deri më tani, u ndalua nga Thesari, tha një burim i njohur me këtë çështje. Banka korrespondente përpunon pagesat e kuponit nga Rusia, duke i dërguar ato te agjenti i pagesave për t’i shpërndarë te mbajtësit e obligacioneve jashtë shtetit. Vendi ka një periudhë mospagimi prej 30 ditësh për të bërë pagesën, tha burimi. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.