SHBA ndalon udhëtimet me Iranin/ Këshillon kundër vizitave në Itali dhe Korenë e Jugut, prej koronavirusit
Presidenti Donald Trump autorizoi ndalimin e udhëtimeve drejt Iranit dhe rekomandoi amerikanët që të mos vizitojnë rajonet e Italisë dhe Koresë së Jugut, që janë të ndikuar nga koronavirusi. Zv/Presidenti Mike Pence detajoi paralajmërimet në një konferencë në Shtëpinë e Bardhë. “Presidenti shtoi tek vendet ku është kufizuar udhëtimi, Iranin, dhe është ndaluar gjithashtu udhëtimi për këdo person të huaj që ka vizituar vendin në 14 ditët e fundit”, tha Pence.
Ai i bëri gjithashtu thirrje amerikanëve që të mos udhëtojnë në zonat në Itali dhe Korenë e Jugut që janë më të ndikuara nga epidemia. Presidenti tha se do të takojë përfaqësuesit e disa prej kompanive më të mëdha të farmaceutikës në botë në nisje të Javës, në përpjekje për të zhvilluar një vaksinë. Sipas Trump, veprimet e shpejta të administratës për të ndaluar udhëtimet kanë mbajtur rrezikun e virusit të ulët për amerikanët. “Ne vepruam herët. Ky ishte një vendim që rezultoi se ka shpëtuar jetë”, tha Trump.
Lajmërimet vijnë pasi shteti i Washingtonit konfirmoi të vdekurin e parë nga koronavirusi në Shtetet e Bashkuara. Ekzistojnë të paktën 64 raste të konfirmuara me koronavirus në Shtetet e Bashkuara, por 3 rastet e fundit janë të parat ku nuk dihet burimi i infeksionit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.