SHBA: Një ngadalësim ekonomik në Kinë do të kishte pasoja globale. Problemet e Evergrande mund të shkaktojnë një krizë financiare

Qeveria amerikane po monitoron nga afër zhvillimet në Kinë, ku gjiganti i pasurive të paluajtshme Evergrande po përballet me një krizë borxhi që mund të përshkojë ekonominë globale, tha Sekretarja e Thesarit Janet Yellen.

“Pronat e paluajtshme janë një sektor i rëndësishëm i ekonomisë kineze. Ato përbëjnë rreth 30% të kërkesës,” tha Yellen në një intervistë. “Dhe një ngadalësim në Kinë, sigurisht, do të kishte pasoja globale. Ekonomia e Kinës është e madhe dhe nëse ekonomia e Kinës do të ngadalësohej më shumë se sa pritej, sigurisht që mund të kishte pasoja për shumë vende që janë të lidhura me Kinën përmes tregtisë,” shtoi ajo.

Firmat e pasurive të paluajtshme në Kinë po përballen me nivele të larta borxhi dhe dështime të afërta, ndërsa problemet nga gjiganti i pasurive të paluajtshme Evergrande po përhapen.

China Evergrande është tani kompania më me borxhe në botë me një grumbull borxhi prej 300 miliardë dollarësh. Ajo ka arritur të paguajë disa kuponë të vonuar në kohë, duke shmangur një mospagim që mund të dërgojë pjesën tjetër të sektorit – dhe ndoshta pjesën tjetër të botës – në një krizë masive.

Yellen u shpreh se autoritetet kineze po përpiqen të menaxhojnë situatën: “Ata sigurisht që po përpiqen ta bëjnë këtë, dhe kjo është diçka që ne po e vëzhgojmë nga afër”.

Komentet e Yellen vijnë pasi Rezerva Federale e SHBA tha në raportin e saj të Stabilitetit Financiar, të publikuar të hënën e kaluar, se streset në sektorin kinez të pasurive të paluajtshme nga kriza e borxhit të Evergrande mund të përhapen edhe në SHBA.

“Duke pasur parasysh madhësinë e ekonomisë dhe sistemit financiar të Kinës, si dhe lidhjet e saj të gjera tregtare me pjesën tjetër të botës, streset financiare në Kinë mund të tensionojnë tregjet financiare globale përmes një përkeqësimi të ndjenjës së riskut, duke paraqitur rreziqe për rritjen ekonomike globale dhe të ndikojnë në Shtetet e Bashkuara”, tha banka qendrore.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.