SHBA parashikohet të rritet me 9.2% në T2 / Në vijim, ekonomia do të ngadalësohet drejt hapit normal të zgjerimit
Ekonomia amerikane parashikohet të zgjerohet ndjeshëm edhe në tremujorin e dytë të këtij viti, përpara se të ngadalësohet në vijim. Prodhimi i Brendshëm Bruto amerikan projektohet të zgjerohet me 9.2% në periudhën prill-qershor, ndërsa Departamenti i Tregtisë do të publikojë të dhënat zyrtare të enjten. Në një botë para pandemisë, kjo do të bënte që rritja vjetore të ishte më e madhja që nga viti 1983. Analistët shprehen se ekonomia më e madhe në botë po shkon gradualisht drejt normalitetit, ndërsa miliona amerikanë janë rikthyer në vendet e tyre të punës. Kjo do të thotë një rikthim gradual drejt mesatares së rritjes prej rreth 2% në vit. Në fakt, vlera neto e familjeve amerikane arriti në 136.9 trilionë dollarë në fund të tremujorit të parë, në rritje me 16% krahasuar me nivelet e vitit 2019, referuar të dhënave të Rezervës Federal. Njëkohësisht, pagesat e borxhit nga familjet krahasuar me të ardhurat personale ranë me 8.2%, duke prekur nivelin më të ulët që nga viti 1980. Por, pjesa më e madhe e kësaj vlere është nxitur nga rritja e aktiveve financiare, të tilla si aksionet. Në këtë situatë, investitorët janë veçanërisht të shqetësuar për rritjen e inflacionin, që mund të sjellë një goditje për prodhimin dhe kërkesën. Ndërsa shumë ekonomistë përfshirë edhe ata të Rezervës Federale pajtohen se inflacioni i lartë është i përkohshëm, Sekretarja e Thesarit, Janet Yellen, paralajmëroi se rritja e çmimeve ka të ngjarë të vazhdojë për disa muaj.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.