SHBA, rekord infeksionesh me Covid – Pavarësisht rasteve në mbi 700 mijë, disa qytete përgatiten për festime
Numri total i rasteve me Covid-19 në Shtetet e Bashkuara, kaloi 54.28 milionë në 24 orët e fundit, me vdekjet që kaluan 824,000, sipas të dhënave të Universitetit John Hopkins. Një total prej mbi 505 milionë doza të vaksinave janë administruar në vend. Të dhënat e Universitetit John Hopkins , tregojnë se numri mesatar ditor i rasteve të reja në Shtetet e Bashkuara, arriti në 300,886 në 7 ditët e fundit, që është më i larti që kur nisi pandemia në vend. Nëse nuk llogaritet mesatarja që sheshon luhatjet ditore, rastet e reja në 24 orët e fundit, arritën në mbi 700 mijë. Thuajse 16% e banorëve në vend janë testuar pozitiv me koronavirus.
Pavarësisht rritjes së rasteve dhe vdekjeve të konfirmuara, qytetet në vend po vazhdonin të përgatiteshin për festimet e Vitit të Ri. Kryebashkiaku i New York City, Bill de Blasio, tha se festimet e mbrëmjes së Vitit të Ri në sheshin “Times Square” më 31 Dhjetor , nuk do të anulohen, ndërkohë që autoritetet shëndetësore kanë miratuar festimet. Rreth 15,000 njerëz pritet të marrin pjesë tek festimet në Times Square, të cilëve do t’i kërkohet vërtetim i vaksinimit dhe vendosje e maskave gjatë eventit. Festimet do të vazhdojnë ende në Las Vegas, pavarësisht rritjes së rasteve dhe vdekjeve. Mbi 300,000 vizitorë pritet të marrin pjesë tek festimet në Las Vegas.
Anulimet në masë dhe vonesat e fluturimeve kanë vazhduar në Shtetet e Bashkuara, për shkak të përhapjes së variantit Omicron dhe motit të keq, në shumë pjesë të vendit. Rritja e rasteve me Omicron ka vendosur gjithashtu spitalet nën presion të madh. Sipas të dhënave, numri i shtrimeve në spitale është rritur me 100% në 6 qendra kryesore të sistemit shëndetësor në Georgia. Numri i rasteve në spitale në Louisiana është trefishuar në 2 javët e fundit, ndërsa numri në Maryland, ndodhet në rritje me 32% nga java e kaluar. Fëmijët në SHBA janë goditur gjithashtu rëndë nga virusi, me numrin e shtrimeve në spitale tek fëmijët që ka arritur rekord të pandemisë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.