SHBA, shpenzimet konsumatore rriten me 0.8% – Analistët parashikojnë performancë të fortë për pjesën e mbetur të 2021
Shpenzimet konsumatore në SHBA u rritën me 0.8%, gjatë gushtit, ndërsa analistët parashikonin një rritje me 0.6%. pavarësisht ngadalësimit të shpenzimeve, pritet një performancë e mirë për pjesën e mbetur të 2021, për shkak të fillimit të shkollave dhe festave të fundvitit.
Shpenzimet konsumatore në SHBA u rritën më shumë se parashikimet e analistëve, gjatë gushtit, por u rishikuan në rënie të dhënat e korrikut, duke i mbajtur të pandryshuara pritshmëritë se ekonomia është ngadalësuar në tremujorin e tretë të vitit, për shkak të rritjes së infektimeve me Covid-19.
Departamenti i Tregtisë deklaroi se shpenzimet konsumatore, që përfaqësojnë më shumë se 2/3 e aktivitetit ekonomik të SHBA, u rritën me 0.8% gjatë gushtit. Rënia e shitjeve të automjeteve, për shkak të mungesës së mikroçipeve, ka dhënë kontributin më të madh në ngadalësimin e shpenzimeve konsumatore. Ndërkohë, të dhënat e korrikut u rishikuan në rënie me 0.1%, nga 0.3% rritje që ishte vlerësimi i mëparshëm.
Ekonomistët e anketuar nga Reuters parashikonin një rritje të shpenzimeve konsumatore me 0.6%, gjatë gushtit. Analistët parashikojnë se, shpenzimet konsumatore do të rriten gjatë pjesës së mbetur të vitit, për shkak të fillimit të shkollës dhe krediteve tatimore për fëmijët që jepen nga qeveria. Edhe festat e fundvitit pritet të rrisin shpenzimet e amerikanëve. Shpërthimet e reja të infektimeve me variantin Delta, sidomos gjatë stinës së verës, dëmtuan kërkesën për udhëtime dhe akomodime në hotele dhe shitjen në bare dhe restorante.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.