SHBA, vaksina gati në 24 orë – Trump: Kjo është një nga arritjet më të mëdha shkencore në histori

Presidenti i SHBA Donald Trump u shpreh  se vaksinimi i parë do të administrohej në Shtetet e Bashkuara në më pak se 24 orë pasi Administrata Amerikane e Ushqimit dhe Barnave të miratonte vaksinën COVID-19 të Pfizer.

“Vaksina e parë do të administrohet në më pak se 24 orë”, tha Trump në një video të postuar në faqen e tij në Twitter.

“Kombi ynë ka arritur një mrekulli mjekësore. Ne kemi shpërndarë një vaksinë të sigurt dhe efektive në vetëm nëntë muaj. Kjo është një nga arritjet më të mëdha shkencore në histori. Do të shpëtojë miliona jetë dhe së shpejti do t’i japë fund pandemisë një herë e përgjithmonë,” shtoi Trump.

FDA dha një autorizim përdorimi emergjent për vaksinën, të zhvilluar me partnerin gjerman BioNTech, i cili u tregua të ishte 95% efektiv në parandalimin e sëmundjes në një provë të fazës së vonë.

FDA tha se vaksina mund t’u jepet njerëzve të moshës 16 vjeç e lart. Punonjësit e shëndetësisë dhe të moshuarit në institucionet e kujdesit afatgjatë pritet të jenë marrësit kryesorë të raundit të parë të 2.9 milion dozave.

Qeveria amerikane ka thënë se do të fillojë shpërndarjen e vaksinës nëpër vend menjëherë pas autorizimit të FDA, dhe se aplikimet e para do të ndodhin në fillim të javës së ardhshme.

Miliona amerikanë mund të fillojnë të vaksinohen këtë muaj, veçanërisht nëse një vaksinë e dytë nga Moderna  miratohet shpejt.

Vaksina nga Pfizer dhe BioNTech u miratua për herë të parë në Britani më parë këtë muaj dhe banorët  filluan të marrin dozat e para që në datën 8 dhjetor. Kanadaja  gjithashtu autorizoi vaksinën dhe pret që të fillojë aplikimet  javën e ardhshme.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.