Shembja e shtëpive/Banorët e unazës në protestë. Veliaj: Do të paguajmë qiranë për 3 vjet
Protesta e banorëve të unazës së re ka hyrë në ditën e 11 të saj. Këta banorë kërkojnë që shteti ti dëmshpërblej për shtëpitë që do të prishen si rezultat i ndërtimit të unazës së re me qëllim lehtësimin e trafikut.
Banorët nuk janë të kënaqur vetëm me pagimin e qirasë, ata duan të futen në proces legalizimi e më pas të dëmshpërblehen për vlerën e pronës.
Por kryetari i Bashkisë së Tiranës Erion Veliaj në një dalje për mediat u shpreh se ky institucion do të mbështes banorët, duke ju paguar qiranë jo për një vit siç ishte diskutuar por për tre vjet.
“Për të gjithë njerëzit që janë të prekur nga ky projekt, bashkia e Tiranës, edhe pse nuk e implementon projektin, pasi është projekt i bashkisë, por që dhe po ta implentonte ajo do të ishte po aq i vendosur. Të gjithë ata qytetarë do të kenë trajtim edhe më të mirë se po i njëjti segment nga Fabrika e miellit tek Tegu. Si bashki e Tiranës kemi ofruar 3 vite qira, për ata që nuk kanë asnjë letër, ta themi troç kanë zaptuar tokën e dikujt tjetër në gjurmët e unazës. Prindërit e mi jetuan këtu por nuk zaptuan diçka, jetuan aty ku i caktoi sistemi, si 99%. Dihej që në kohën e Adil Çarçanit që aty kalon rruga”.
Ndërkohë që do të mundësohet edhe strehimi në banesa sociale si dhe do të bëhet dëmshpërblim për banorët që i kanë shtëpitë e legalizuara.
Numri i ndërtesave që do të prishen nga ndërtimi i unazës së re janë rreth 317, ku rreth 130 prej tyre janë në proces legalizimi, proces ky që ka ngrirë si rezultat i projektit.
Nga ana e tyre banorët shprehen se do të përshkallëzojnë protestat, ndërkohë që protesta e radhës do të jetë të mërkurën më 14 nëntor në orën 16.00.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.