“Shëndetësia në kolaps”, Basha në Lushnje: Të ndalen koncesionet, Rama të financojë shëndetësinë
Kreu i Partisë Demokratike, Lulzim Basha, i ka kërkuar kryeministrit Edi Rama te ndalë financimin e koncesioneve dhe të japë më shumë para për shëndetësinë, duke filluar që nga rimbursimi i paketës së ilaçeve të Covid. Gjatë takimit të zhvilluar me qytetarët në Lushnje, Basha apeloi për marrjen e menjëhershme të masave për të mbrojtur shëndetin e qytetarëve dhe ekonominë e vendit
“Një qeveri dhe një kryeministër nuk gjykohen nga llafet as nga ajo që vesh apo zhvesh. Ajo gjykohet se çfarë bën me taksat e shqiptarëve, çfarë bën me taksat që u mbledh njerëzve, si i shpenzon lekët. Ky e ka bërë të qartë që edhe në kohën e pandemisë, dhe paratë e buxheti nuk i çon për të trajtuar të sëmurët, për të testuar, për të parandaluar zinxhirin e infeksioneve, për të pajisur spitalet dhe ndihmuar ekonominë, ky në kohën e pandemisë ka vazhduar dhe e ka shtuar vjedhjen, siç e shton çdo hajdut kur e di që po i vjen fundi.”
Sipas kreut të opozitës , vendimi i pare që do marre Partia Demokratike kur te vij ne pushtet është kthimi i parave të taksave në shërbime për qytetarët .
“Vendimi i parë që do të marr është se paratë e shqiptarëve nuk do shkojnë për klientët e kryeministrit, nuk do shkojnë për grupet mafioze, që kanë kapur ekonominë prej fyti, nuk do shkojnë për oligarkët që marrin 10% të PBB-së krahasuar me 3% që është vendi i dytë më i lartë në Europë, por do të shkojnë direkt tek njerëzit.”
Basha përsërit masat e propozuara javë më parë nga opozita, duke kërkuar zbatimin e tyre për ndryshimin e situatës shëndetësore në të cilën ndodhet vendi.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.