Shëndetësia në “krizë” – Spahia denoncon gjendjen e spitaleve dhe projektin e patronazhimit

Me një status në Facebook deputeti i Partisë Demokratike Bardh Spahia vijon të denoncojë  gjendjen në të cilat ndodhen spitalet tona. Sipas Deputetit  në  pavijonin e Neonatologjisë të maternitetit të ri nuk ka inkubatorë dhe poste për oksigjenimin e fëmijëve.

Spahiu shkruan se : “Janë gjithsej 13 burime oksigjeni për 19 fëmijë neonatë që kanë nevojë e si pasojë e mungesave bëhen lidhje dyshe, 1 inkubator për 2 neonatë. Kur situata paraqitet e tillë në Tiranë çfarë ndodh në rrethe?”

Më herët deputeti Spahia ka denoncuar edhe projektin e patronazhimit të spitaleve rajonale që kanë nevojë për mjekë specialist. Sipas tij një gjë e tillë nuk është zgjidhje e problemit por një çorientim më i madh i sistemit shëndetësorë. Gjatë vitit 2018 Ministria e Shëndetësisë do të zbatojë projektin e partonazhimit të spitaleve rajonale nga ato universitare.

Kështu  Spitali Universitar i Traumës do të ketë në patronazh spitalin e Fierit , të Vlorës dhe të Gjirokastrës. Spitali Universitar Nënë Tereza do të ofrojë asistencë me mjekë specialist në spitalet rajonale të Dibrës, Beratit, Korçës dhe Elbasanit. Ndërsa spitali Shefqet Ndroqi do të ofrojë ndihmë në spitalin e Shkodrës, të Kukësit dhe të Lezhës. Ky plan do të ndihmojë në eliminimin e radhëve në spitalet universitare dhe do ofrojë shërbim të specializuar mjekësor aty ku janë nevojat e qytetarëve. Në të njëjtën kohë do të ndihmojë  dhe në formimin profesional të mjekëve në spitalet rajonale.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.