Shëndeti i fëmijëve, Shqipëria si Suedia – Fëmijët nën peshë, problem jo i përhapur, në listën e vendeve të zhvilluara

Në nivel global, 1 në 7 fëmijë lind nën peshë, nën 2.5 kilogramë. Kjo bën që fëmijët nën peshë të zënë 80% të vdekje të të porsalindurve por edhe të shkaktojë probleme të mëdha në jetën e mëtejshme shëndetësore të atyre fëmijëve.

Këtë e thotë “The Lancet”, revista më prestigjioze mjekësore në botë, në një raport të publikuar së fundmi. Raporti thotë se lindjet nën peshë janë një dukuri më së shumti e përhapur në vendet me të ardhura të ulta dhe të mesme. 90% e fëmijëve të lindur nën peshë vjen nga këto vende. Por, Shqipëria përbën përjashtim, duke u renditur krah vendeve që e vuajnë më së paku këtë problem.

Madje, Shqipëria radhitet krah vendeve skandinave dhe atyre më të zhvilluara të botës. Në vendin tonë, vetëm 4.6% e të porsalindurve janë nën peshë, pra diçka më pak se 1 në 20. Mesatarja globale fiksohet në rreth 15%. Madje, Shqipëria është në vendin e 6-të në botë, në këtë drejtim. Vendin e parë e mban Suedia me vetëm 2.8% të fëmijëve të porsalindur nën peshë, ndërsa më pas ndjek Finlanda Islanda, Serbia, Norvegjia dhe Shqipëria.

Vende shumë të zhvilluara të botës si SHBA, Franca, Britania apo Gjermania e kanë këtë normë mes 6-8%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.