“Shëndoshen” depozitat – Prekin nivelin më të lartë në 10 muaj
Depozitat bankare u rritën me afro 75 milionë euro në dhjetor 2018, duke arritur nivelin më të lartë në 10 muaj. Sipas Bankës së Shqipërisë, në fund të vitit të kaluar depozitat arritën vlerën e afro 989 miliardë lekëve. Kjo është vlera më e lartë e depozitave në banka që nga muaji shkurt 2018. Depozitat në gjysmën e dytë të vitit 2018 shfaqën një tendencë në rritje, pavarësisht se normat e interesit janë në nivele minimale.
Sistemi bankar është tejet likuid dhe në fund të vitit të kaluar raporti mes kredive dhe depozitave ishte më pak se 54%. Kjo dëshmon se sistemi ka potenciale të mëdha të pashfrytëzuara për të rritur huadhënien. Në kushtet kur edhe qeveria po ul ndjeshëm huamarrjen në tregun e brendshëm, rritja e kreditimit për sektorin privat, çka po bëhet gjithnjë e më shumë sfida kryesore.
Burimi: Banka e Shqipërisë
Depozitat në euro vazhdojnë të dominojnë, me mbi 51% të totalit. Pavarësisht zhvlerësimit të monedhës europiane ndaj lekut në dy vitet e fundit, shqiptarët vazhdojnë të preferojnë kryesisht euron si monedhë për mbajtjen e kursimeve.
Veç faktorit psikologjik, kjo zgjedhje lidhet edhe me shkallën e lartë të euroizimit të ekonomisë reale dhe faktin që shumica e aseteve kuotohen në euro. Për këtë arsye, Fondi Monetar Ndërkombëtar në deklaratën e fundit i bëri thirrje qeverisë të bëhet pjesë e strategjisë së deeuroizimit, duke vendosur kufizime për kryerjen e transaskioneve të brendshme në monedhë të huaj.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.