Shengeni i Ballkanit Perëndimor – Bota e biznesit në Shqipëri e duartroket. Gjykata Kushtetuese mund ta rrëzojë
Komuniteti i biznesit e mirëpret maksimalisht nismën e tre vendeve të Ballkanit Perëndimor për krijimin e atij që njihet si shengeni i rajonit. Këtë gjë e deklaroi në Argument, Alban Zusi, kreu i shoqatës së eksportuesve shqiptarë.
Nga ana tjetër, diplomati Lisen Bashkurti deklaroi se, marrëveshja është e nxituar dhe se në të ardhmen ajo mund të hidhet poshtë nga Gjykata Kushtetuese.
Aleksandër Vucic, Zoran Zaev dhe Kryeministri shqiptar deri më tani kanë zhvilluar dy takime. I fundit ndër ta, ai i Ohrit prodhoi vetëm një deklaratë me 9 pika sa i përket angazhimit të tre vendeve, jo vetëm në këtë nismë, por veçanërisht në ndjekjen e objektivit të kahershëm; atë të anëtarësimit në Bashkimin Europian.
Takimi i radhës mes palëve do të zhvillohet në Durrës më 21 dhjetor, ku të ftuar janë edhe tre vendet e tjera të Ballkanit Perëndimor.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.