Shenja për ngadalësimin e ekonomisë / Varianti Delta mund të “pengojë” hapin e rimëkëmbjes globale
Të dhënat nga Shtetet e Bashkuara të Amerikës dhe nga Kina, që përfaqësojnë më shumë se gjysmën e rritjes ekonomike globale, sugjerojnë një ngadalësim të hapit të rimëkëmbjes, në një kohë që çmimet e lëndëve të para vijojnë rritjen. Paralelisht me rritjen e infektimeve me variantin Delta të koronavirusit, tregjet e aksioneve mund të dërgojnë shenja alarmi mbi parashikimin për ecurinë e ekonomisë, paralajmëron Deutsche Bank. Ndërkohë që çmimet rriten, konsumatorët po e ulin kërkesën. Kjo është e kundërta e asaj që do të pritej, nëse mjedisi do të ishte vërtet inflacionist dhe kjo tregon se ekonomia globale po ecën me shpejtësi të ulët, shprehen ekspertët e bankës gjermane. Ndërkohë, me dollarin në nivelin më të lartë që nga fundi i marsit, të dhënat e fundit tregojnë se pozicionet afatgjata të dollarit kundër shportës me monedhat ndërkombëtare kanë prekur nivelin më të lartë që nga marsi i vitit 2020. Vlerësimi i dollarit përballë euros dhe monedhave të tjera të vendeve në zhvillim është i papritur, duke pasur parasysh pasiguritë ekonomike. Parashikimet në muajt e fundit dhe shenjat se ekonomia globale do të rimëkëmbej ndjeshëm pas pandemisë, bënë që tregjet e aksioneve të rriteshin në nivelet më të larta në histori. Por, përhapja me shpejtësi e variantit Delta në shumë vende të botës, po rikthen sërish frikën për një ngadalësim të ekonomisë globale.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.