“Shërimi” i ekonomisë do më shumë kohë/BSH: Pesimizëm nga Eurozona, shtohen rreziqet e brendshme
Kthimi në ekuilibër i ekonomisë shqiptare do të kërkojë më shumë kohë se parashikimet e mëparshme. Këshilli Mbikëqyrës i Bankës së Shqipërisë në mbledhjen e ditës së mërkurë arriti në përfundimin se faktori kryesor që do të frenojë ekonominë shqiptare është stimuli i dobët nga ekonomia europiane. Por, Guvernatori, Gent Sejko, theksoi sërish se edhe rreziqet e brendshme për rritjen ekonomike dhe inflacionin janë në rritje. Sipas tij, këto rreziqe lidhen me kreditimin e ngadaltë, ndikimin e kursit të këmbimit në inflacion dhe me situatën e tensionuar politike në vend.
Banka e Shqipërisë ngelet pozitive në gjykimet për ecurinë e sistemit financiar. Guvernatori tha se ritmet e rritjes së kredisë janë përmirësuar, ndërsa pritshmëritë për të ardhmen ngelen pozitive, mbështetur në uljen e rrezikut të huadhënies dhe në mbylljen e procesit të konsolidimit të sektorit bankar.
Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit në nivelin 1%. Nga ana tjetër, Sejko tha edhe njëherë se normalizimi i politikës monetare do të jetë mjaft i kujdesshëm, edhe duke pasur parasysh skenarët më pesimistë lidhur me rritjen e ekonomisë dhe të çmimeve. Banka e Shqipërisë pret që inflacioni të kthehet pranë objektivit prej 3% në gjysmën e parë të vitit 2021.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.