Sheshet e parkimit, mbi gjysmë milioni bileta të shitura në Tiranë – Për festa 41 mijë automjete në Sheshin “Skënderbej”

Gjatë vitit 2017, në të gjitha sheshet Eco-Parking në Tiranë, janë shitur rreth 574 mijë bileta parkimi, ku peshën më të madhe e mban parkingu nëntokësor nën Sheshin “Skënderbej”.

Që prej inaugurimit, në Qershor të vitit 2017, në këtë parking janë shitur mbi 137 mijë bileta parkimi. Vetëm gjatë muajit Dhjetor, për shkak të festave të fundvitit që rritën vizitat në kryeqytet, ky shesh parkimi shiti 41,428 bileta, duke mbushur shpeshherë të 368 vendet e parkimit të disponueshme.

Pa përfshirë abonimet e kryera për vendparkime, bileta e shitura përkthehen në rreth 90 milionë lekë të ardhura, nëse llogarisim vetëm tarifën minimale të faturueshme.

Nga kjo shifër, rreth 27.5 milionë lekë janë të ardhura të gjeneruara nga parkimi nëntokësor në shesh, 22.4 milionë i takojnë sheshparkimit pranë Stadiumit Dinamo dhe 17 milionë lekë atij pranë sheshit “Avni Rustemi”, i cili për momentin është në proces rikonstruksioni.

Nëse i ndajmë sipas biletave të shitura, vendin e tretë e mban parkimi pranë Qytetit Studenti me mbi 90 mijë bileta. Më pak i frekuentuari nga parkingjet rezulton ai tek Piramida me vetëm 2314 bileta të shitura.

Të dhënat e bëra publike nga Agjencia Tirana-Parking përmes portalit të Bashkisë përfshijnë vetëm sheshet dhe jo parkimet në rrugë. Aktualisht po vazhdon edhe shpërndarja e kartave të rezidentit, përmes së cilave qytetarët mund të parkojnë falas në zonat e banimit.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.