Shëtitorja “Taulantia” në Durrës/ Së shpejti me një pamje tërësisht të re
Shëtitorja “Taulantia” në Durrës, e ashtuquajtur ndryshe dhe si zona e ‘’Vollgës’’, po i nënshtrohet një rikonstruksioni tërësor.
Vija bregdetare dhe Sheshi “Taulantia”, nga një zonë e amortizuar dhe me vend depozitime të shumta mbetjesh pranë detit, po shndërrohet në një park qendror, duke ofruar më shumë hapësira publike jo vetëm për rreth 175,000 banorë të qytetit bregdetar, por edhe turistët.
“Rreth 1 km vijë bregdetare, përfshinë sistemimin e rreth 30 mijë m2 sheshe dhe ndërtimin e shkallareve deri në det. Projekti përfshinë dhe rreth 20 mijë m2 sipërfaqe te gjelbëruar, mbjelljen e rreth 500 pemëve dhe rreth 6500 shkurreve dekorative, fusha sportive, kënde lojërash, parkim”, tha Dritan Agolli, drejtori i Fondit Shqiptar të Zhvillimit, realizuese e këtij investimi.
Aktualisht janë kryer punimet për mbrojtjen detare, por i gjithë sheshi qendror do të ketë në brendësi zona për evente dhe një parkim të ri në shërbim të qendrës. Projekti financohet nga qeveria shqiptare dhe zbatohet nga Fondi Shqiptar i Zhvillimit në bashkëpunim me Bashkinë Durrës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.