Shifra të larta infektimesh me COVID-19 në 24 orët e fundit. Shtohen dhe rastet e shtrimit në spitale

Vijojnë shifrat e larta dhe shqetësuese të pandemisë në vendin tonë, ku në 24 orët e fundit shihet një numër i lartë i të shtruarve në spital, i cili është mbi 45, ndërkohë edhe sot ashtu si një ditë më parë janë shënuar 9 humbje jete, duke e çuar në 527 numrin total të viktimave.

Në 24 orët e fundit janë  321 raste të reja të infektuarish me COVID-19 dhe 121 të shëruar, duke e çuar në 11 mijë e 367 numrin e të rikuperuarve që nga fillimi i pandemisë në vendin tonë.

Sipas ministrisë së Shëndetësisë aktualisht në 3 spitalet Covid, po trajtohen 328 pacientë,  ku 12 prej tyre janë në terapi intensive, nga të cilët 5 pacientë janë të intubuar.

Në 2 spitalet Covid, tek Infektivi dhe te “Shefqet Ndroqi” kanë humbur jetën një 44 vjeçar, një 70 vjeçar, 71 vjeçar, 78 vjeçar, dhe dy qytetare nga 84 vjeç nga Tirana, një 67 vjeçar nga Mallakastra dhe dy qytetarë nga Korça, 74 dhe 82 vjeç.

Gjatë 24 orëve të fundit janë kryer 1 mijë e 446 testime duke e çuar numrin e të prekurve nga fillimi i pandemisë në  21 mijë e 523, aktualisht raste aktive janë 9 mijë e 629.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.