Shifrat dhe lajmet më të fundit nga bota nën COVID-19 – KB: Pandemia është kriza më e madhe globale që nga Lufta e Dytë Botërore
Koronavirusi global është kriza më e rëndë me të cilën përballet bota që nga Lufta e Dytë Botërore, paralajmëroi kreu i Kombeve të Bashkuara. Antonio Guterres foli ndërsa KB publikoi një raport mbi dëmin social dhe ekonomik të shkaktuar nga pandemia COVID-19. “Sëmundja e re koronavirus po sulmon shoqëritë në thelbin e tyre, duke prekur jetët dhe jetesën e njerëzve,” tha Sekretari i Përgjithshëm i KB. “COVID-19 është testi më i madh me të cilin jemi përballur së bashku që nga formimi i Kombeve të Bashkuara.” “Ne po përballemi me një krizë globale shëndetësore ndryshe nga historia 75-vjeçare e Kombeve të Bashkuara, e cila po vret njerëz, duke përhapur vuajtje njerëzore dhe duke dëmtuar jetën e njerëzve,” thuhet në raport.
SHBA
Ndërkohë Presidenti i SHBA Donald Trump ka paralajmëruar amerikanët të përgatiten për ” një ferr dy javor” së shpejti pasi Shtëpia e Bardhë parashikoi se mund të ketë midis 100,000 dhe 240,000 vdekje në SHBA nga pandemia. Sidoqoftë, ajo tha që shifra të tilla nuk ishin të pashmangshme. Trump tha se ndjekja e udhëzimeve zyrtare ishte një “çështje për jetë a vdekje” për amerikanët dhe parashikoi që vendi së shpejti do të shihte një “dritë në fund të tunelit”. Deri më tani pandemia ka vrarë më shumë se 3.500 amerikanë dhe ka infektuar 170,000 më shumë.
Shifrat e fundit nga Europa
- Në Evropë, autoritetet kanë konfirmuar vdekjen e dy fëmijëve nga koronavirus, ndërsa Franca dhe Spanja raportuan shifra zhgënjyese pasi numri i viktimave dhe infeksioneve vazhdoi të rritet.
- Belgjika raportoi vdekjen e një vajze 12-vjeçare nga virusi, ndërsa Mbretëria e Bashkuar tha se një djalë 13-vjeçar nga Londra gjithashtu kishte vdekur.
- Hollanda ka zgjatur periudhën e mbylljes deri në 28 Prill. Vendi tani ka raportuar mbi 1.000 vdekje.
- Polonia po sjell masa të reja që kufizojnë lëvizjen, përfshirë mbylljen e bizneseve jo thelbësore. Fëmijët nën 18 vjeç mund të dalin jashtë vetëm të shoqëruar nga një i rritur.
- Presidenti i Komisionit të BE-së, Ursula von der Leyen paralajmëroi se masat emergjente nuk duhet të rrezikojnë “parimet dhe vlerat themelore” të Europës.
- Kjo erdhi një ditë pasi parlamenti i Hungarisë miratoi fuqitë e reja për qeverinë e Viktor Orban. Franca dhe Belgjika gjithashtu kanë forcuar fuqitë ekzekutive.
- Numri i viktimave nga COVID-19 në Francë u dyfishua brenda një jave, zbuluan shifrat e së martës. Janë regjistruar 359,000 gjoba dhe 5.8 milion kontrolle sigurie të kryera gjatë dy javëve të para të bllokimit, thotë ministri francez i brendshëm.
- Spanja njoftoi një rekord të ri, duke raportuar numrin më të madh të vdekjeve në ditë, 849 në 24 orë.
- Numri i vdekjeve të përditshme të Italisë gjithashtu arriti në 800 përsëri, por autoritetet po flasin me kujdes për të arritur një rrafshnaltë në numrin e rasteve.
- Numri ditor i vdekjeve në Mbretërinë e Bashkuar u rrit me 389 për të bërë një total prej 1,789. Në mes të kritikave për mungesën e lehtësirave të testimit, një nga ministrat e qeverisë tha se qëllimi është që të rriten testet në 25,000 në ditë deri në mes të prillit.(Euronews)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.