Shifrat e INSTAT/ Ulet numri i ndërmarrjeve të huaja në Shqipëri!

Në vitin 2018, numri i ndërmarrjeve të huaja dhe të përbashkëta u ul me 0,6 %, krahasuar me vitin 2017. Peshën më të madhe të ndërmarrjeve të huaja dhe të përbashkëta e zënë Italia dhe Greqia me 52,8 % të ndërmarrjeve; 60,6 % të punësimit; 52,3 % të eksporteve dhe 53,2 % të importeve.

Referuar të dhënave të INSTAT, ndërmarrjet me pronësi 100 % të huaj përfaqësojnë 65,6 % të ndërmarrjeve të huaja e të përbashkëta gjithsej, ndërsa ndërmarrjet e përbashkëta me mbizotërim të huaj përfaqësojnë 13,7 % të tyre.

Në vitin 2018, ndërmarrjet me origjinë nga shtetet e Bashkimit Evropian zënë 2,5 % të ndërrmarjeve aktive gjithsej në Shqipëri dhe 64,8 % të ndërmarrjeve të huaja dhe të përbashkëta.

Ndërmarrjet me origjinë nga shtetet e Ballkanit Perëndimor përfaqësojnë 10,3 % dhe ndërmarrjet me origjinë nga shtetet e tjera zënë 24,9 % të ndërmarrjeve të huaja e të përbashkëta.

Por investimet e huaja direkte janë rritur!

Në vitin 2018 stoku i IHD është rritur me 17,8 %, krahasuar me vitin 2017. Në fund të vitit 2018, vendet e BE-së përbënin pjesën më të madhe të Stokut (54,7 %), të dominuara nga Greqia me 15,1 % dhe Hollanda me 13,2 %.

Në vitin 2018 fluksi i IHD është rritur me 13,3 %, krahasuar me vitin 2017, ku SHBA ka patur rritjen më të madhe me gati 4 herë, ndërsa Gjermania rënien më të madhe me 1 herë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.