Shisnin ushqime për fëmijë me datë skadence të falsifikuar – Arrestohen në flagrancë 2 shtetas dhe sekuestrohen rreth 7 ton produkte

Autoriteti Kombëtar i Ushqimit në bashkëpunim me Seksionin për Krimin Ekonomik e Financiar në Drejtorinë Vendore të Policisë Tiranë dhe Prokurorinë e Rrethit Gjyqësor Tiranë, njofton se pas një hetimi disa javor kanë finalizuar operacionin e koduar “SKADENCA”.

Sipas njoftimit në kuadër të këtij operacioni u bë arrestimi në flagrancë i dy shtetasve qe kishin hapur një subjekt në lagjen e quajtur “Mullishta” Kashar, Tiranë, kishin marrë një magazinë me qira dhe ku tregtonin në sasi të mëdha produkte të ndryshme industriale ushqimore për fëmijët.

AKU bën me dije se këto produkte kishin tejkaluar afatin e skadencës, ishin me data prodhimi dhe skadence të fshira si dhe me data skadence të falsifikuara ndërsa këta shtetas në bashkëpunim me njëri-tjetrin merrnin produktet e skaduara, u fshinin datat e skadencave duke përdorur lëndë kimike (açeton) dhe i vendosnin data të reja skadence duke shtyrë afatin deri në dy vjet.

Konkretisht AKU njofton se është gjetur dhe sekuestruar një sasi totale produktesh prej 6.83 Ton:

–          Pije për fëmijë me datë prodhimi të falsifikuar 10080 copë.

–          Çamçakëzë të skaduar dhe me datë prodhimi të falsifikuar 257090 copë.

–          Lëpirëse, produkt i skaduar dhe me datë prodhimi të falsifikuar 370656 copë.

–          Lëngje, produkt i skaduar dhe me datë skadence të falsifikuar 1786 shishe (bidona).

Në njoftim thuhet se çështja i ka kaluar për kompetence Prokurorisë pranë Rrethit Gjyqësore Tirane për veprat penale dhe “Mashtrim me produktet ushqimore e kryer në bashkëpunim” dhe “Falsifikimi i vulave, stampave dhe i formularëve”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.