Shitja e energjisë nga kompania e OSHEE-së – Prej 1 dhjetorit me rregullore të re, në prill-maj u siguruan 4.3 mln euro të ardhura

Rregullorja që përcakton procedurat e shitjes së tepricave të energjisë elektrike në tregun e parregulluar nga ana e Furnizuesit të Tregut të Lirë do të hyjë në fuqi në datën 1 dhjetor të këtij viti. Vendimi është marrë nga Enti Rregullator i Energjisë,  duke i lënë kohë shoqërisë publike të furnizuesit publik, të realizojë ndryshimet e nevojshme në platformën IT online të blerjes së energjisë elektrike, me qëllim përdorimin e kësaj platforme edhe në procedurat e shitjes së tepricave të energjisë elektrike në tregun e parregulluar.

Aktiviterti tregtar i FTL bazohet në një vendim të para disa muajve, që u mor nga Enti Rregullator i Energjisë, i cili kushtëzoi nisjen e shitjes së tepricave të energjisë në tregun e parregulluar, duke u bazuar në rregulloren që përdoret nga Korporata Elektroenergjetike Shqiptare. Ndërkohë që, ndonëse aktualisht kjo shoqëri është duke blerë energji nga importi për shkak mungesës së prodhimit, aktiviteti tregtar nuk ka munguar, duke qenë se gjatë muajit prill dhe maj përmes proceduarve të shitjes u siguruan rreth 4.3 mln euro.

Në total, për periudhën 24 prill deri 21 maj, u shitën 77.600 Mwh energji me çmim mesatar prej 56.5 euro/ Mwh. Referuar legjislacionit në fuqi, shoqëria publike e furnizimit në tregut e lirë ka detyrimin për blerjen e energjisë elektrike nga burimet e rinovueshme të energjisë. Fillimisht, kjo energji tregtohet për mbulimin e humbjeve të Operatorit të Sistemit të Shpërndarjes me të njëjtin çmim me të cilin e blen këtë energji nga prodhuesit me përparësi të energjisë elektrike. Ndërkohë që, në rast të tepricave të krijuara ato tregtohen në treg të parregulluar me çmimin që ofron ky treg.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.