Shitje rekord makinash në Europë, rritja në 10.1% gjatë Janarit
Në muajin e parë të këtij viti, në Europë u regjistruan 10.1% më shumë automjete të reja, çka do të thotë se sektori e ka nisur vitin me këmbën e mbarë. Me përjashtim të Zvicrës, Irlandës dhe Sllovakisë, të gjitha tregjet europiane raportojnë rritje.
Gjermania raporton një rritje mujore në 10.5%, bindshëm mbi nivelet e vitit të kaluar, kur rritej në tërësi me vetëm 4.5%. Në Mbretërinë e Bashkuar, sektori raporton një rritje modeste në 2.9%.
Në Francë rritja fiksohet pranë 10.6%, në Itali pranë 10.1% dhe në Spanjë në 10.7%. Pavarësisht progresit, tregu europian i automjeteve nuk mund të quhet ende i rimëkëmbur nga kriza financiare globale.
Në vitin 2007, sektori rritej me 6% në vit. Sot, vetëm vendet e Europës veriore, ose më saktë, ato më pak të goditura nga masat shtrënguese mund të quhen të rimëkëmbura nga kriza.
Sa i përket shtëpive prodhuese, Volkswagen raporton një rritje në 10%, duke konfirmuar kuotat e saj në treg, në 24.2%. Grupi gjerman i makinave ndiqet nga francezët e PSA, që zënë 10.1% të tregut, në rritje me 6.5% gjatë Janarit.
Në vend të tretë në treg konfirmohet Renalut me 9%. Më pas ndjekin Ford me 7%, duke u rritur me 9.5% gjatë Janarit. Fiat Chrysler nga ana tjetër raporton një rritje prej 15.2% gjatë Janarit, falë shitjeve rekord të Alfa Romeos, në rritje me 31.4% gjatë muajit të parë të vitit.
Mes aziatikeve në vend të parë është Toyota që zë 5.2% të tregut, dhe ndjekin Nissan, Hyundai, Kia dhe Volvo.
Roel Korkuti/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.