Shitjet me pakicë në Britani rriten në Shkurt, perspektiva për tremujorin qëndron e dobët

Shitjet me pakicë në Britani u rritën sipër projeksioneve në muajin Shkurt, por perspektiva e konsumit mbetet e dobët. Volumi i mallrave të shitura në dyqane dhe online u rrit me 1.4%, sipër projeksioneve nga ekonomistët për një rritje me 0.4%, tregon zyra kombëtare e statistikave.

Megjithatë, në tre muajt e fundit shitjet janë në rënie. Konsumatorët po ndjejnë rritjen e çmimeve në mallrat ushqimorë dhe karburante, gjë që përbën lajme të këqija për një ekonomi që mbështetet te shpenzimet private.

Nëse për muajin Mars shitjet nuk rriten me 3.3%, shifra për tremujorin e parë do të jetë në rënie. Inflacioni në Britani është rritur në nivelin më të lartë që prej vitit 2013 dhe pritet të tejkalojë rritjen e pagave, duke i lënë britanikët me më pak para për të shpenzuar.

Çmimi i mallrave me pakicë të shitura në Shkurt u rrit me një normë vjetore prej 2.8%. Analistët e zyrës së Statistikave thonë se rritja e çmimeve të naftës ka sjellë rezultatin e tre muajve të fundit. Guvernatori i Bankës së Anglisë ka thënë se politikëbërësit po mbikëqyrin shpenzimet konsumatore për shenja dobësie.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.