Shkarkime dhe emërime të reja në bordin e FSHZH dhe Këshillin Kombëtar të Kontabilitetit
Ministrat e Turizmit, Bujqësisë, Integrimit Europian dhe Ekonomisë nuk do të jenë më pjesë e bordit të Fondit Shqiptar të Zhvillimit. Qeveria shqiptare ka miratuar ndryshimet gjatë mbledhjes së fundit, ku ka caktuar edhe anëtarët e rinj të këshillit drejtues.
Emrat përfshijnë zëvendësministrin e Infrastrukturës dhe Energjisë, Artan Shkrelin; zëvendësministren e Financave dhe Ekonomisë, Albana Shkurta; zëvendësministrin e Turizmit dhe Mjedisit, Hajrulla Çeku, si dhe drejtorin e përgjithshëm të Agjencisë për Zhvillim Ekonomik Rajonal.
Edhe pas ndryshimet, numri i përfaqësuesve të pushtetit qendror në bordin e FSHZH mbetet i njëjtë me 4 anëtarë.
Njëkohësisht me këtë vendim, Këshilli i Ministrave ka vendosur sot me propozim të ministrit Arben Ahmetaj edhe ndryshimin e disa anëtarëve të Këshillit Kombëtar të Kontabilitetit.
Lirohen nga funksioni i tyre si anëtar i këtij këshilli, anëtarët Anila Çili, Agim Binaj Dhe Vjollca Karapici. Për anëtarin Fran Brahimi është vendosur rimandatimi si pjesë e këtij këshilli, ndërsa emrat e rinj që i shtohen organit janë Edlira Luçi, propozuar nga ministri dhe Greta Angjeli, propozuar nga organizatat e profesioneve të lira.
Detyrat e këtij organi profesional publik janë propozimi i ndryshimeve në legjislacionin për kontabilitetin, hartimi i standardeve kombëtare të kontabilitetit dhe nxitja e zbatimit të tyre dhe standardeve ndërkombëtare.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.