Shkarkimet në administratë, Beqiraj: Ligji i nëpunësit ndalon shkarkimin nga ministri
Shkarkimet dhe kallëzimet penale të ndodhura ditët e fundit në disa institucione publike kanë qenë në fokus të diskutimit mbrëmjen e sotme në emisionin “Argument” të gazetarit Enio Civici, ku e ftuar ka qenë Zv.ministrja e Financave, Irena Beqiraj.
Sa i takon Ministrisë së Financave, Beqiraj siguroi se puna në këtë dikaster vijon normalisht, madje disa herë theksoi se këtë gjë e garanton zbatimi i tre ligjeve kryesore, përfshirë ligjin e nëpunësit civil, kodin doganor dhe ligjin e procedurave tatimore:
“Më lejoni t’iu them që vazhdimin normal të punës në Ministrinë e Financave nuk mund ta sigurojë ministri, nuk mund ta sigurojë zëvendësministri, por e sigurojnë tre ligje shumë të rëndësishme, njëri prej tyre është ligji i nëpunësit civil, ligji i dytë është kodi doganor dhe ligji i tretë është ai procedurave tatimore”, pohoi Beqiraj.
Nga ana tjetër, Zv.ministrja Beqiraj argumentoi se në cilat raste mund të “të firmoset” shkarkimi nga detyra i një nëpunësi civil, referuar ligjit, vendimit të Këshillit të Ministrave dhe urdhrit të kryeministrit. Madje ajo shpjegon procedurën që ndiqet, duke nisur nga mbledhja e fakteve, ngritja e grupit disiplinor dhe shkarkimi apo dhënia e vërejtjeve administrative për një nëpunës të Ministrisë së Financave. Ndërkohë sa i takon Tatimeve dhe Doganave, Beqiraj prerazi tha se nuk është ministri ai që firmos shkarkimin, por sipas saj këtë kompetencë e kanë drejtorët.
“Për sa i përket zbatimit të ligjit dhe shkarkimeve mund t’iu them që ministri i Financave nuk mund të shkarkojë nëpunës civil të Ministrisë së Financave, në funksion të marrëveshjes, në funksion të VKM-së dhe urdhrit të kryeministrit. Mund të mblidhen të gjitha provat, ngrihet grupi që bën monitorimin, pasi janë mbledhur provat e nevojshme duke ia vënë në dispozicion Sekretarit të Përgjithshëm. Sekretari i Përgjithshëm i Ministrisë së Financave apo në çdo rast i çdo ministrie tjetër ngre grupin disiplinor dhe merr në shqyrtim provat. Është grupi disiplinor, i cili i propozon ministrit në rastin konkret të Ministrisë së Financave për të shkarkuar një person të caktuar, apo për t’i dhënë një vërejte administrative, në bazë të aktit që është kryer. Ndërsa te Tatimet dhe Doganat kjo kompetencë iu njihet vetëm drejtorëve. Ministri i Financave nuk shkarkon askënd te Tatimet dhe Doganat”, përfundoi Beqiraj.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.