Shkarkohet nr.2 i tatimeve – Pas nisjes së aksionit anti-informalitet, Ervin Hoxha “viktima” e parë
Rreth një muaj e gjysmë pas nisjes së aksionit anti-informalitet shkarkohet një nga zëvendësdrejtorët e administratës tatimore. Nga burime të Ministrisë së Financave dhe Ekonomisë, mësohet se Ervin Hoxha është liruar nga kjo detyrë. Vendimi ka ardhur vetëm një ditë pasi kryeministri Edi Rama në një postim të tij në rrjetet sociale për të promovuar aplikacionin “STOP INFORMALITETIT” ndër të tjera shkruante:
Dhe më e mira e kësaj pune është se goditen abuzuesit dhe zbulohen edhe inspektorët abuzues, që bëjnë raporte fiktive nga kafenetë, për rryshfet a për dembelizëm – “Një gur që vret dy zogj”.
Duket se edhe gjatë kësaj periudhe të aksionit kundër informalitetit inspektorë të hetimit tatimor kanë vijuar më abuzime ndaj subjekteve të ndryshme të biznesit. Ishin pikërisht këto abuzime, që në korrik 2017 detyruan Ervin Hoxhën, i cili në atë periudhë mbante postin e kreut të hetimit tatimor, që të jepte dorëheqjen e parevokueshme nga ky post. Gjithsesi, ai është rikthyer sërish në administratën tatimore në muajin maj 2019, por tashmë si zëvendësdrejtor i përgjithshëm.
Elisabeta Dosku/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.