Shkelje ligjore në fushën e Prokurimit Publik – KLSH kallëzon në Prokurori krybashkiakun e Belshit, drejtorin e Bujqësisë si dhe punonjës të tjerë
Kontrolli i Lartë i Shtetit ka kallëzuar në Prokurorinë e Rrethit Gjyqësor Elbasan kryetarin e Bashkisë Belsh A.T, drejtorin e Bujqësisë H.XH, përgjegjësin e urbanistikës I.H, juristen R.T, dy kolaudatorë M.K. dhe P.M si dhe një mbikëqyrës të punimeve.
Kallëzimi ka ardhur pas përfundimit të auditimit në Bashkinë Belsh për veprimtarinë nga data 1 janar 2016 – 31 dhjetor 2017, ku janë konstatuar shkelje dhe parregullsi të dispozitave ligjore në fushën e prokurimit publik.
Sipas raportit të KLSH-së, shkeljet kryesore janë evidentuar:
Në tetë tendera për kualifikimin dhe shpalljen fitues pa të drejtë të operatorëve ekonomikë që nuk plotësojnë kriteret e vendosura në DS me një vlerë totale prej 286 080 460 lekë.
Në tre tendera për dëmin ekonomik në vlerën 11 403 571 lekë, për shkak të diferencës ndërmjet vlerës së ofertës së operatorit ekonomik të kualifikuar padrejtësisht dhe vlerës së ofertës së operatorit ekonomik të s’kualifikuar [padrejtësisht.
Në një rast të lidhjes shtesë së kontratës, në një kohë kur nuk ekzistonin rrethana ligjore për kryerjen e punimeve përmes shtesës së kontratës.
Në katër investime publike për dëmin ekonomik në vlerën 40 395 547 lekë shkaktuar nga diferenca në volume pune të stacionuara dhe likuiduara, por që nuk kanë rezultuar punë të kryera.
Në një rast tjetër për demin ekonomik me vlerë 23 917 140 lekë nga likuidimi i punimeve të kryera jo sipas specifikimeve teknike të projektit.
KLSH i ka rekomanduar Bashkisë Belsh ndërmarrjen e masave me karakter organizativ me qëllim eliminimin e praktikave që kanë ndikuar negativisht në buxhet, kryesisht në fushën e tatimtaksave, të ardhurave të munguara në vlerën 65 929 mijë lekë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.