Shkelje në spitalin e traumës – KLSH: Tenderë abuzivë, asnjë monitorim për koncesionin e sterilizimit
Kontrolli i Lartë i Shtetit ka konstatuar një sërë shkeljesh gjatë auditimit në Spitalin Universitar të Traumës për vitet 2016 dhe 2017.
Sipas raportit rezulton se pajisjet mjekësore dhe të hotelerisë, me një vlerë prej rreth 707 milion lekësh janë futur në magazinë pa çmime dhe pa faturë shitjeje, ndërkohë që janë nxjerrë jashtë përdorimit aktive në vlerën e rreth 50 milion lekësh, pa u zbatuar procedura ligjore që kërkon Ministria e Financave.
KLSH konstaton probleme edhe në drejtim të koncesionit të sterilizimit të instrumenteve kirurgjikalë, për të cilin Fondi i Sigurimit të Detyrueshëm të Kujdesit Shëndetësor, vetëm për periudhën shtator-dhjetor 2017 ka paguar 81 milion lekë. Sipas KLSH-së, për këtë shërbim nuk ka asnjë monitorim apo dhe konfirmim nga spitali, të llojit të ndërhyrjes, numrit të operacioneve të kryera, për të cilat koncesionari paguhet nga FSDKSH, çka bie në kundërshtim me kontratën e koncesionit.
Nga ana tjetër rezulton se për 2 vitet e auditimit janë kryer 31 procedura prokurimi për blerje medikamentesh dhe materialesh mjekësore, me një vlerë totale prej rreth 212 milion lekësh, në kundërshtim me vendimin e qeverisë, i cili ngarkon Ministrinë e Shëndetësisë për të kryer këtë proces. Mbi bazën e këtyre përfundimeve KLSH ka kërkuar nga Prokuroria e Tiranës nisjen e hetimeve.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.