Shkelje të rënda me tenderët – Dëmi në buxhet arrin vlerën e 3.8 milionë eurove
Institucionet publike janë kapur me shkelje të rënda në dhënien e tenderave dhe zbatimin e kontratave. Sipas raporti të Kontrollit të Lartë të Shtetit, dëmi ekonomik i rezultuar në fushën e prokurimit të nevojave për mallra, shërbime, investime publike, kap vlerën e përgjithshme 464 milionë lekë apo 3.8 milionë euro.
KLSH bën me dije se dëmi është konstatuar si në fazën e zhvillimit të procedurave të prokurimit, ashtu edhe në fazën e zbatimit të kontratave dhe dorëzimit të punimeve. Problematikat e konstatuara nga auditimet e KLSH-së, lidhen jo vetëm me planifikim jo të drejtë të nevojave por edhe një proces të realizuar jo në përputhje me kërkesat ligjore në fuqi.
“Mangësitë i referohet implementimit jo të saktë të kërkesave dhe detyrimeve ligjore nga entet publike që prokurojnë fondet përmes sistemit të prokurimit publik, fakt që lidhet edhe me kapacitetet njerëzore jo gjithmonë profesionale, që përfshihen në realizimin e këtij procesi”, citon raporti i KLSH.
Sipas strukturës së dëmit të konstatuar nga auditimet e periudhës janar – shtator të vitit 2019, problematikat në fushën e prokurimeve publike përbëjnë rreth 25% të totalit të dëmit. Shkeljet në procedurat e prokurimit vetëm në 9 subjekte kanë sjellë një dëm ekonomik në buxhet në rreth 116 milionë lekë, ndërsa shkeljet për zbatimin e kontratave në 27 subjekte, kanë sjellë një dëm në masën e 347 milionë lekë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.