Shkelje të rregullave të qarkullimit dhe largim nga vendi i aksidentit – Procedohen penalisht 48 shtetas në Tiranë
48 shtetas janë proceduar penalisht për shkelje të rregullave të qarkullimit rrugor gjatë javës së kaluar si rrjedhojë e kontrolleve të ushtruara në rrugët urbane dhe interurbane të Tiranës.
Nga të dhënat e Policisë Rrugore, 16 prej shtetasve janë proceduar për ‘Shkelje të rregullave të qarkullimit rrugor’, 29 për ‘Drejtim mjete në mënyrë të parregullt’ si dhe 3 për ‘Largim nga vendi i aksidentit’. Ndërkohë, janë plotësuar po ashtu edhe 19 kërkesë padi nga Policia për ‘urdhërmbrojtje të menjëhershme.’
Ndërkohë, gjatë javës që lamë pas strukturat e Drejtorisë Vendore të Policisë Tiranë në kuadër të evidentimit dhe goditjes të paligjshmërisë kanë proceduar penalisht 291 shtetas, ku nga këta:
- 69 shtetas të arrestuar për vepra të ndryshme penale
- 206 shtetas të proceduar në gjendje të lirë
- 16 shtetas të shpallur në kërkim
Po ashtu, Policia njofton se ka vijuar kontrolli i territorit në zbatim të planit të masave kundër kultivimit të lëndëve narkotike në të gjithë qarkun e Tiranës.
“Në kuadër të policimit në komunitet kanë vijuar takimet sensibilizuese në shkolla kundër përdorimit të alkoolit dhe lëndëve narkotike. Janë kryer takime dhe mbledhje me shefat e komisariateve të kryeqytetit, për caktimin e porosive dhe prioriteteve në drejtim të evidentimit dhe goditjes të paligjshmërisë.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.