Shkeljet për dokumentet e tenderëve – APP i tërheq vëmendjen institucioneve, rekomandim për të zbatuar procedurat ligjore

Agjencia e Prokurimit Publik ka konstatuar një sërë shkeljesh në drejtim të hartimit të dokumenteve të tenderit nga ana e institucioneve shtetërore, duke rekomanduar një sërë hapash që duhet të ndiqen në mënyrë që të zbatoheh dispozitat ligjore në fuqi. Sipas APP-së, nga asistimet e deritanishme është konstatur se në disa raste dokumentet e tenderit të kontratave të shërbimeve nuk përfshihen termat e referencës, ndërsa në kontratat e mallrave nuk përfshihet grafiku i lëvrimit.

Po ashtu, është konstatuar se në kontratat e punëve shpesh entet kontraktore nuk përfshijnë në dokumentet e tenderit projektin dhe specifikimet apo edhe grafikun e ekzekutimit. Për këtë arsye APP kujton se dokumentet e tenderit duhet të përfshijnë të gjithë informacionin specific të nevojshëm për konratën e punës, mallit apo shërbimit që prokurohet.

Gjithashtu, sipas Agjencisë së Prokurimit Publik autoritetet duhet të ngarkojnë në sistemin elektronik edhe procesverbalin e argumentimit dhe specifikimeve teknike dhe kritereve të veçanta të pranimit, pasi gjatë asistimit të deritanishëm të proceduarve të prokurimit është konstauar se autoritetet kontraktore, në proceverbalin e hartimit të kritereve të veçanta të kualifikimit, nuk  japin argumentimin teknik të kritereve të veçanta të kualifikimit në raport me natyrën dhe përmasat e kontratës.

Teksa APP jep këto rekomandim, shumë subjekte i drejtohen Komisionit të Porkurimit Publik për t’u ankuar në lidhje me hartimin e kriterve dhe dokumenteve të tenderit. Vetëm në muajin nëntor,  ishin 64 subjekte që u ankuan pranë KPP-së, teksa 38 prej këtyre ankesave apo rreth 60% e tyre u pranuan, duke iu dhënë të drejtë operatorëve ekonomikë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.