Shkëmbimet tregtare me Ukrainën – Rreth 4 miliard lekë në total, importet zënë 0.86% të totalit të importeve
Statistikat e tregtisë së jashtme të mallrave për Ukrainën, sipas INSTAT, tregojnë se gjatë vitit 2020 importet janë rritur duke kapur shifrën më të lartë për pesë vitet e fundit. Vlera e importeve për vitin që lamë pas arrin afërsisht 4 mld lekë, shifër kjo më e lartë se ajo e vitit 2019 e cila arrinte vlerën e 3 mld lekëve.
Nëse flasim për eksportet, ato nuk arrijnë në vlerën e tyre më të lartë për vitin 2020 krahasuar me pesë vitet e fundit. Vlera e eksporteve për 2020-ën arrin deri në 3 mln lekë, ndërsa vlerën më të lartë e mban viti 2017 me afërsisht 4 mln lekë.
Grupmallrat që zëne peshën më të madhe të importeve tona me Ukrainën janë “ushqim, pije alkoolike dhe duhan”, të ndjekur nga grupi i materialeve të ndërtimit dhe metaleve, e ndërsa grupi që zë peshën më të vogël të importeve është grupi i produkteve kimike dhe plastike. Sa i përket peshës së importeve tona me Ukrainën ndaj totalit të vendeve të tjera, ato zënë vetëm 1% të importeve.
XHORXHINA DEDA / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.