Shkencëtarja në Wuhan: Tek lakuriqët ndodhen edhe viruse të tjerë “pandemik” – Pse origjina e Covid-19 nuk dihet akoma?
Lakuriqët e natës në rajonet kufitare të jugut dhe jug-perëndimit të Kinës strehojnë koronavirusë të tjerë që tashmë kanë aftësinë të kalojnë te njerëzit, ka thënë një shkencëtare e shquar kineze.
Dr. Shi Zhengli i Institutit të Virologjisë Wuhan tha se këto viruse, përfshirë të afërmit e ngushtë të Sars-CoV-2, i cili shkakton Covid-19, ka të ngjarë të qarkullojnë në natyrë përtej Kinës.
“Ne nuk duhet t’i kërkojmë vetëm në Kinë, por edhe në vendet e Azisë Jugore”, tha Shi, e cila është mbiquajtur “Batwoman”, sepse grupi i saj kërkimor studion koronavirusët e lakuriqëve.
Komentet e saj, të cilat u bënë në një uebinar të organizuar nga akademitë mjekësore dhe veterinare franceze, erdhën ndërsa dy ekipe ndërkombëtare – një e koordinuar nga Organizata Botërore e Shëndetit dhe një e ngritur nga revista mjekësore Lancet – përgatiten për të hetuar origjinën e pandemisë një vit pasi filloi zyrtarisht.
Këto përpjekje janë politizuar shumë. SHBA dhe Kina akuzojnë njëra-tjetrën se janë në origjinën e pandemisë ndërsa lufta e tyre tregtare vazhdon. Vende të tjera, përfshirë Indinë, janë emëruar gjithashtu si burime të mundshme.
Laboratori i Shi u akuzua se ishte burimi i një rrjedhje aksidentale virale në fillim të vitit. Nuk ka asnjë provë për të mbështetur pretendimin dhe Shi e ka mohuar atë me forcë.
Rezervuari natyror për Sars-CoV-2 mendohet të jenë lakuriqët e natës, dhe megjithëse Shi tha se virusi ka shumë të ngjarë që të ketë kaluar te një kafshë tjetër para se të arrinte tek njerëzit, kjo kafshë ende nuk është identifikuar.
D.B – SCAN
Burimi: The Guardian
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.