Shkollat me koncesion – Bashkia e Tiranës hap garën për 4 objekte, vlera 1.74 mld lekë

Bashkia e Tiranës ka hapur një procedurë për ndërtimin e 4 shkollave të reja përmes partneritetit publik-privat. Kostoja totale e projektit kap vlerën e 1.74 mld lekëve, ndërkohë që kompania fituese duhet të bëjë projektimin, financimin, ndërtimin dhe mobilimin e godinave. Gjithashtu, objekt i kontratës do të jetë dhe mirëmbajtja, mbikëqyrja dhe kolaudimi i objekteve që do të ndërtohen.

Ndërkaq, në procedurën e shpallur janë vendosur edhe kriteret mbi bazën e të cilëve do të përzgjidhet ofertave fituese, ku 50% të peshës e kanë kriteret teknike sikurse është plan vendosja e objektit në terren, integrimi i kopshtit me shkollën 9-vjeçare apo konceptimi i shkollës si qendër komunitare. Ndërkaq, peshën kryesore e mban oferta ekonomike me 35% të pikëve, ndërsa marzhi i fitimit përbën 15% të pikëve.

Sipas garës së shpallur, objektet e reja do të ndërtohen në njësitë administrative 2 dhe 8 si dhe në Njësinë Administrative Dajt. Ndërkohë që kohëzgjatja e kontratës koncesionare do të jetë 8 vjet e 6 muaj. Kompanitë e interesuara duhet të paraqesin ofertat e tyre deri në datën  20 maj.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.