Shkrirja më e madhe për vitin 2020. “S&P Global” do blejë “IHS Markit” për 44 miliardë dollarë
Gjiganti i të dhënave, “S&P Global”, ka rënë dakord të blejë “IHS Markit”, në një marrëveshje prej 44 miliardë dollarë, që do të jetë edhe më e madhja për vitin 2020 në botën e korporatave, duke krijuar një lojëtar të fortë në tregun e informacionit financiar. Marrëveshja, që përfshin 4.8 miliardë dollarë borxh, tregon se aktiviteti i shkrirjeve të korporatave po përshpejtohet, ndërkohë që lajmet pozitive mbi vaksinën po përmirësojnë perspektivën ekonomike.
Në tremujorin e tretë, marrëveshjet mes korporatave kaluan 1 trilionë dollarë transaksione, kryesisht në sektorët e pavarur ndaj krizës së koronavirusit, si teknologjia dhe kujdesi shëndetësor. Nën kushtet e marrëveshjes, çdo aksion i IHS Markit, do të këmbehet për një normë fikse prej 0.2838 aksione të S&P Global, sipas deklaratës së dy kompanive. Pasi marrëveshja të përfundojë aksionerët e S&P do të zotërojnë thuajse 67.75% të kompanisë së bashkuar.
S&P Global njihet për ofrimin e vlerësimeve të borxhit për shtetet dhe kompanitë, si dhe të dhëna mbi tregjet e aksioneve dhe lëndëve të para. IHS Markit është themeluar në 2016, kur IHS, që ofron të dhëna mbi industritë e makinave dhe teknologjisë, bleu Markit për rreth 6 miliardë dollarë. Kompania ka një vlerë tregu prej rreth 36.88 miliardë dollarë dhe është rritur me 22% deri më tani për vitin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.