Shkrirjet në Farmaceutikë – Sanofi ofron $11.6 mld për firmën amerikane që trajton hemofilinë

Gjiganti francez i farmaceutikës, Sanofi, ka rënë në dakordësi për të blerë firmën amerikane Bioverativ, të specializuar në trajtimin e hemofilisë, për 11.6 miliardë dollarë.

Kjo është ujdia më e madhe në 7 vite dhe do të fuqizojë prezencën e kompanisë franceze në trajtimin e sëmundjeve të ralla. Vlera në treg e Sanofi ra me 3.4%, duke e kthyer aksionin në performuesin më të keq në indeksin e titujve të kapitalit në Francë, CAC 40, ndërkohë që shumë analistë e vlerësuan të shtrenjtë marrëveshjen.

Kjo lëvizje vjen në një kohë të rritjes së interesit nga prodhuesit e mëdhenj të barnave ndaj firmave më të vogla të bioteknologjisë.

Sanofi ra dakord të blejë të gjithë aksionet ekzistuese të Bioverativ, në 105 dollarë për aksion në para cash’, që është 64% sipër vlerës së Bioverativ, krahasuar me tregtinë e një dite më parë.

Bioverativ, prodhuesi i barnave për trajtimin e hemofilisë, u nda nga kompania Biogen herët gjatë 2017-ës.

Transaksioni shënon kthimin e suksesshëm të Sanofi në bërjen e negociatave, pas dështimit të disa blerjeve të planifikuara gjatë viteve të fundit. Sanofi humbi ndaj Pfizer në blerjen e kompanisë në Kaliforni Medivation, dhe ndaj Johnson & Johsnon, për të blerë firmën zvicerane Actelion.

Sanofi deklaroi se tregu që merret me trajtimin e hemofilisë, ka shitje në rreth 10 miliardë dollarë çdo vit, me 181,000 persona të ndikuar në të gjithë botën.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.