Shmanget mbyllja e qeverisë së SHBA/ Trump nënshkruan ligjin që do të zgjasë financimin deri më 20 Dhjetor
Presidenti Donald Trump nënshkroi ligjin që do të zgjasë financimin për shumë agjenci federale deri më 20 Dhjetor dhe shmangë mbylljen e pjesshme të Qeverisë. Zyrtarët e Shtëpisë së Bardhë bënë të ditur se Trump nënshkroi paketën e miratuar nga Senati republikan me një votim 74 pro 20 kundër. Shtëpia e Përfaqësueseve e drejtuar nga demokratët kaloi masën këtë javë me një votim 231 pro 192 kundër.
Deri më 20 Dhjetor, anëtarët e senatit dhe shtëpisë së Përfaqësuesve do të negociojnë për mënyrën se si do të shpërndahet paraja në të gjithë agjencitë federale. Ata shpresojnë që të arrijnë në një dakordësi për të mbajtur qeverinë operuese deri më 30 Shtator 2020. Megjithatë, puna e tyre mund të ndërlikohet nga hetimi i demokratëve ndaj Donald Trump. Në Dhjetor, Shtëpia e Përfaqësueseve mund të ndodhet në një debat të ashpër për shkarkimin e presidentit republikan. Komisioni i Inteligjencës po heton nëse Trump i ka kërkuar Ukrainës që të hetojë rivalin demokrat, Joe Biden, në këmbim të fondeve të Shteteve të Bashkuara. Debati mund të arrijë kulmin përpara afatit të 20 Dhjetorit, ku do të skadojë përsëri financimi federal nëse Kongresi dhe Trump nuk arrijnë një marrëveshje.
Pjesa më kontradiktore e paketës së shpenzimeve për vitin fiskal që nisi më 1 Tetor është kërkesa e Trump për të ndërtuar murin miliarda dollarësh në kufirin me Meksikën. Premtimi i Trump për murin ishte në qendër të fushatës së tij në 2016-ën, pavarësisht se premtoi atëherë se Meksika vetë do paguajë për murin. Pasi dështoi të bindë Kongresin për t’i dhënë para për financimin e murit, Trump ka përdorur autoritetin e emergjencës për të kanalizuar para tek muri nga projekte të ndryshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.